ILOILO – Ginpasalig sang Iloilo Provincial Government nga bastante ang supply sang baboy sa Iloilo subong nga Holiday Season.
Sa interview sang Bombo Radyo kay Dr. Darel Tabuada, head sang Provincial Veterinary Office, iya ginpahayag nga nadugangan sang ginabanta 10,000 heads sang swine sa inventory sang probinsya subong nga tuig.
Suno kay Tabuada, ang buhi nga baboy ang mabakal sa average nga P197/kilo samtang P343/kilo naman ang presyo sang karne sang baboy.
Pahayag niya, padayon sa gihapon ang shipment sang baboy halin sa iban nga lugar sa Pilipinas agud maka-augment sa local supply sang probinsya.
Base sa monitoring sang Department of Agriculture, nagapakita nga ang pork ham kag liempo ang may presyo nga P330 tubtob P350 kada kilo sa nagkalain-lain nga merkado sa Western Visayas.
Una na nga ginpahayag ni Iloilo Governor Arthur Defensor Jr., nga naga-amat amat pa recover ang probinsya gikan sa halit sang African Swine Fever.
Sa 28 ka mga banwa nga naapektuhan sang ASF halin tuig 2022, 17 na ang na-upgrade halin sa RED zone nga nangin PINK zone.
Ang Red zones amo ang mga lugar nga infected sang ASF samtang ang Pink zones naman amo ang mga lugar nga wala sang ASF apang adjacent ini sa infected nga lugar.
