Gin-endorso sang isa ka House party-list lawmaker subong nga Lunes ang civilian-drafted impeachment complaint batok kay Vice President Sara Duterte, bisan pa nga gin-discourage ni Presidente Ferdinand Marcos, Jr. ang pagpahalin sa tunga sang ila nabungkag nga kaangtanan sa politika.
Gin-endorso ni Akbayan party-list nga si Rep. Perci Cendaña ang impeachment complaint nga gin-file sang mga civil society organizations kag pamilya sang mga biktima sang Tokhang agud pahalinon sa puwesto si Duterte, nga ginatawag sini nga “critical juncture in demand of accountability sang aton pungsod.”
Sang nagligad nga semana, ginkumpirmar ni Marcos nga ginhingyo niya sa mga mamalidha nga likawan ang pagpasaka sang impeachment complaint batok kay Duterte sa diin gintawag ini nga “waste of time”.
Ang mga tagreklamo amo sanday Teresita Quintos Deles, Fr. Flaviano Villanueva, Fr. Robert Reyes, Randy Delos Santos (tiyo sang biktima sang Tokhang nga si Kian Delos Santos), Francis Aquino Dee, Leah Navarro, Sylvia Estrada Claudio, Alicia Murphy, Sr. Mary Grace De Guzman, kag anay Magdalo Rep. Gary Alejano, kag iban pa.
Kaupod nila ang Mamamayang Liberal partylist first nominee kag anay senador nga si Leila De Lima, nga nag-akto bilang tagpamaba sang grupo.
Sa ambush interview, ginpahayag ni Cendaña nga ang basehan sang impeachment complaint amo ang betrayal of public trust, culpable violations of the Constitution, kag other high crimes.
