Gindihon sang nagkalain-lain nga sektor sang grupo ang civilian-drafted impeachment complaint batok kay Vice President Sara Duterte.
Sa interview sang Bombo Radyo kay Former Magdalo Partylist Representative Gary Alejano, iya ginpahayag nga ang impeachment complaint ang ginbalay nanday Teresita Quintos Deles, Fr. Flaviano Villanueva, Fr. Robert Reyes, Randy Delos Santos (tiyo sang biktima sang Tokhang nga si Kian Delos Santos), Francis Aquino Dee, Leah Navarro, Sylvia Estrada Claudio, Alicia Murphy, Sr. Mary Grace De Guzman, kag iban pa.
Suno kay Alejano, madugay na kontani gin-file ang complaint bangud man sa madamo sang basehan ang ila ginalantaw agud ma-draft ang amo nga reklamo.
Lakip na diri ang ang betrayal of public trust, culpable violations of the Constitution, kag other high crimes.
Ginpahayag man sini nga ‘sufficient’ ang mga gin-akto sang bise-presidente agud nga mapahalin ini sa pwesto.
Nagapati man ang natungdan nga ang pumuluyo ang may ikasarang nga maduso sang kinamatarong agud nga mapasabat ang mga public officials sang ila mga ginahimo.
Isa naman sa rason nga gintumod ni Alejano sa delay nga pag-file sang complaint amo ang endorsers sang reklamo bangud kinahanglan nga myembro mismo sang House of Representatives ang maga-endorse sang reklamo.
Kon balikan, sang nagligad nga semana, ginkumpirmar ni President Ferdinand “Bongbong” Marcos Jr. nga ginhingyo niya sa mga mamalidha nga likawan ang pagpasaka sang impeachment complaint batok kay Duterte sa diin gintawag sini nga “waste of time”.
