Nagapati si Former Magdalo Partylist Representative Gary Alejano nga kinamatarong sang isa ka tawo ukon grupo ang mag-file sang impeachment complaint batok sa isa ka ‘impeachable officer’ sang Pilipinas.
Sa interview sang Bombo Radyo kay Alejano, iya ginpahayag nga ang amo nga tikang ang isa ka palaagyan agud nga mapasabat ukon mangin accountable ang isa ka opisyal sang gobyerno.
Suno kay Alejano, tuman na ka ‘blatant’ ukon maathag ang pag-abusar ni Vice President Sara Duterte sang iya nga otoridad sa Office of the Vice President.
Ginpakamalaut man sini ang indi pagrespeto ni Duterte sa proseso nga ginapatuman sa Kamara.
Nagapati man ang natungdan nga bisan sin-o ka pa, ukon ano man ang ranggo, nagakadapat lang nga hatagan sang pagtahod kag respeto ang House of the Representatives.
Gin-athag man sini nga role lamang sang Kamara nga protektahan ang gobyerno batok sa pagpang-abuso sang puder kag resources sang pungsod.
