Nagpaathag ang Department of Public Works and Highways (DPWH) Region 6 sa motorista nga indi na sila mag-adjust ukon magdugang sang height sang vertical clearance signage sa Ungka Flyover.
Ini kasunod man sang insidente sang pagkahulog sang signage bangud sa pagsagaid sang modernized bus.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga apisar sang nagapatuman sila sang rectification sa ibabaw nga bahin sang flyover, bukas sa gihapon ini para sa mga light vehicles.
Suno kay Oropel, gina-control sang talatapan ang movement sang flyover rason man nga wala ginapahanugutan nga makalabay ang dalagko nga salakyan.
Gin-athag man sini nga sa Disyembre 25 pa ‘fully’ nga magabukas ang Ungka Flyover, kon sa diin mahimo na nga makalabay ang tanan.
Liwat naman nga nagpangayo sang malawig nga pasensya ang talatapan sa publiko agud nga maintindihan ang sitwasyon sang Ungka Flyover.
