Nakahanda ang 3rd Infantry Division Philippine Army, para sa palaabuton nga founding anniversary sang Communist Party of the Philippines/New People’s Army/National Democratic Front (CPP/NPA/NDF).
Sa interview sang Bombo Radyo kay Colonel Erwin Rommel Lamzon, Assistant Division Commander for Administration, 3rd Infantry Division Philippine Army, iya ginpahayag nga sa subong, may yara sila sang ‘firm system’ nga monitoring sa hulag sang nasambit nga mga grupo.
Suno kay Lamzon, nakakoordinar na sila sa Barangay Task Force sang National Task Force to End Local Communist Armed Conflict (NTF-ELCAC) agud nga ma-verify kon may mga paghulag sa bahin sang mga rebelde.
Nagapati man ang natungdan nga kinahanglan nakahibalo sila sa mga nakalatabo sa tagsa ka mga barangay agud man nga mapalab-ot sa komunidad ang ‘awareness’ nahanungod sa posible matabo kon magasulod ang mga residente sa rebelde nga grupo.
Gin-athag man sini nga apisar nga dismantled na ang isa ka area ukon lugar sa probinsya, nagapabilin nga ‘established’ ang ila internal domestic security protocols.
