Nagtuga sang kakugmat sa pila ka pumuluyo sang barangay Tigum, Pavia, ang pagpalupok sang armas sang punong barangay sa tunga sang kinagamo sa isa ka basketball game sa ila lugar.
Sa interview sang Bombo Radyo kay Ruby Rivera, residente sang barangay, iya ginpahayag nga sang nagginamo ang mga players, nagpalapit si Punong Barangay Ferdinand Guillem nga may dala nga pusil, gin-gabot ini kag ginpalupok.
Suno kay Rivera, hubog si Guillem sang amo nga tion.
Ginpahayag niya nga wala nagakabagay ang nangin aktwasyon sang punong barangay bangud nga madamo sang kabataan sa palibot kag delikado ang iya ginhimo nga pagpalupok sang pusil nga yara pa ini sa idalom sang impluwensiya sang makahulubog nga ilimnon.
Suno pa kay Rivera, sang ginpamangkot si Guillem kun sin-o ang tag-iya sang armas, ginsiling niya nga iya ini sang myembro sang civilian volunteer organization apang sang ginpamangkot naman ini nga pangalanan ang tag-iya sang pusil, ginsiling niya nga wala siya makadumdom.
Sa subong, luyag sang tagreklamo nga ipalab-ot sa Department of the Interior and Local Government ang ginhimo sang amo nga opisyal agud maimbestigaran ini.
