WESTERN VISAYAS – Nagapanawagan ang Philippine Health Insurance Corp. (PhilHealth) sa publiko nga magparehistro sa Konsulta Facility agud ma-avail sang libre ang consultation services.
Sa interview sang Bombo Radyo kay Janimhe Jalbuna, Head sang Public Affairs Unit sang PhilHealth Region 6 , iya ginpahayag nga tanan nga sector sang komunidad ang kwalipikado sa nasambit nga benepisyo.
Suno kay Jalbuna, sakop sang PhilHealth Konsulta Package ang initial kag follow-up primary consultations, health screening kag assessment, laboratory ukon diagnostic services kag mga bulong base sa ginreseta sang doctor.
Gin-aprubahan naman sang Board of Directors ang preventive oral health benefit package para sa tanan apang indi pa matul-id kun san-o ini mangin epektibo.
Ang Konsulta program ang kabahin sang commitment sang talatapan agud malab-ot ang universal health care sa Pilipinas.
