Padayon pa nga ginatumod sang kapulisan ang motibo sa pagtiro-patay sa Punong Barangay kag bana sini sa Bangga Tonoy, Brgy. Tinocuan, Dueñas Iloilo.
Ang mga biktima amo sanday Punong Barangay Michelle Lamela, 47-anyos, sang Barangay Sto. Niño, Dueñas kag bana sini nga si Rodney Arellano Lamela, 48-anyos, kag may pito ka mga kabataan.
Sa interview sang Bombo Radyo kay Police Regional Office 6 Director Police Brigadier General Jack Wanky, iya ginpahayag nga ila ginakosiderar ang mga anggulo kom ini ang may kahilabtanan sa politika ukon daan nga hiligut-anon sang bana sini.
Suno kay Wanky, wala ginadula sang ila talatapan ang mga motibo nga ‘politically motivated’, ika-duha, ang background sang bana sang punong-barangay nga imbolbado sa pagpatay sa isa ka tawo naangot sa bulangan sang 1994.
Lakip man sa ginasundan nga motibo ang 2008 case, kon sa diin may kaso nga homicide sang bana sang kapitan kasunod sang pagpatay sa utod sang isa ka anay police personnel.
Sa subong wala pa sang nagaguwa nga mga witnesses sa insidente, apang nagpasalig ang natungdan nga masolbar ang kaso sa mas temprano nga panahon.
Padayon pa ang imbestigasyon sa natabo nga insidente, kun sa diin may ginakaptan na nga pila ka mga ebidensya ang otoridad.
