Gin-athag ni Iloilo 3rd District Representative Lorenz “Nonoy” Defensor nga simple lang nga panyapon ang ‘fellowship’ nga ginpatigayon sa Malacañang.
Sa interview sang Bombo Radyo kay Congressman Defensor, iya ginpahayag nga sa amo nga kahiwatan, nagpirma sang ‘manifesto of support’ ang mga party leaders agud suportahan ang administrasyon ni Pres. Ferdinand Marcos, Jr., kag ang Kamara.
Suno kay Defensor, naglaum siya nga maistoryahan ang impeachment complaint ni Vice President Sara Duterte apang, wala gid ini nasambit sa kahiwatan.
Lakip man sa ginpahayag sang president suno kay Defensor, ang pagdayaw sini sa nangin trabaho sang Kamara.
Nagalaum man ang mamalidha nga mas maklaro ang dalagan sang impeachment complaint ilabi na nga duha na ka panumbungon ang na-draft batok sa bise-presidente.
Nahibaluan nga ginabanta 180 ka mga mamalidha ang nagpirma sang ‘manifesto of support’ sa ginpatigayon nga fellowship sang nagligad nga adlaw sa Malacañang.
