Nagapadayon sa gihapon ang pagprotesta sang pila ka komunista nga pwersa sa South Korea apisar sang pagbawi ni South Korean President Yoon Suk Yeol sang emergency martial law.
Sa interview sang Bombo Radyo kay Rhandy Tolentino, Bombo International Correspondent in South Korea, iya ginpahayag nga “hilaw” ang pagdeklarar sang Martial Law sang presidente sang South Korea.
Suno kay Tolentino, sang nagdeklarar si President Yoon Suk Yeol, wala gilayon nakahibalo ang Philippine embassy kag ang pila ka mga Pinoy sa amo nga pungsod.
Ginpahayag man sini nga tubtob subong may candle light rally nga ginapatigayon, kon sa diin, kalabanan sa mga nagpartisipar amo ang pamatan-on.
Gin-athag man sang natungdan nga ang pagbawi sang martial law ang kasunod sang pagpasar sang mosyon sang South Korean parliament sa ginpatigayon nga National Assembly kon sa diin, nakakuha sang boto nga 300 to 190.
Nahibaluan nga kasunod sang resulta sang binotohay, wala na diri sang mahimo ang presidente kundi bawion ang pagdeklarar sang Martial Law.
Una ginpahayag sang administrasyon sang South Korea nga ginpatuman ang tikang agud proteksyunan ang kahilwayan kag constitutional order bangud sa mga opposition.
