Liwat nga ginpaboran sang Timor-Leste ang request sang gobyerno sang Pilipinas nga i-extradite ukon ibalik diri sa pungsod si former Negros Oriental Representative Arnolfo “Arnie” Teves Jr.
Base sa statement sang Department of Justice (DOJ), isa ini ka daku nga kadalag-an para sa mga Pilipino kag isa ka mapag-on nga ebidensya sa commitment sang gobyerno nga makuha ang hustisya.
Sampaw-sampaw nga mga kaso ang ginapangatubang ni Teves partikular na ang murder bangud siya ang ginatudlo nga nagpapatay kay anay Negros Oriental Governor Roel Degamo kag pila ka iban pa nga mga tawo sang 2023.
Kun matandaan, sang Hunyo, gin-grant na sang Timor-Leste ang nauna nga extradition request sang Pilipinas. Apang ginkontra sang kampo ni Teves ang ruling sa procedural grounds ilabi na ang numero sang huwes nga involved sa amo nga desisyon.
Bangud sini, nagmandu ang korte nga magpresentar liwat ang duha ka mga partido sang ebidensya sa amo nga kaso, apang sa ikaduha nga tion, nagdesisyon ini pabor sa gobyerno sang Pilipinas.
Nahibaluan nga magluwas nga may kaso nga murder bangud sa kamatayon ni Degamo, ginkasuhan man si Teves bangud sa ginaalegar nga pagpatay sa tatlo ka lain pa gid nga mga tawo sa Negros Oriental sang 2019.
Gin-tag man sang Anti-Terrorism Council nga “terorista” ang anay kongresista kag ang 12 ka iban pa bangud sa ginaalegar pagpamatay kag pagpang-harass sa amo man nga probinsya.
Agusto sang nagligad nga tuig sang ginsipa siya halin sa Kamara bangud sa padayon sini nga pag-absent sa trabaho kag pagtinir sa luwas sang pungsod.
