Nagpanugyan ang Iloilo Provincial Health Office (IPHO) sa publiko nga magpa-screen ukon magpa-test agud matumod ang HIV (human immunodeficiency virus) status.
Ini kasunod man sang mataas nga numero sang mga kaso sang amo nga balatian sa Iloilo.
Sa interview sang Bombo Radyo kay Dr. Rodney Labis, Chief, Health Service Delivert Division sang Iloilo Provincial Health Office, iya ginpahayag nga mas makapamaayo kon may ihibalo ang isa ka tawo sa iya nga HIV status agud nga ma-link ini treatment.
Suno kay Labis, ini agud man nga ma-maintain ang practices agud mapabilin nga nonreactive ukon negatibo sa HIV.
Apang, kon maguwa naman nga positibo sa amo nga balatian, mahimo sa gihapon ini nga matabangan paagi sa mga bulong nga nagabulig pabalik sang healthy nga immune system.
Gihingyo man sini ang Ilonggo nga magpakig-angot sa tagsa ka Rural Health Unit (RHU) sa ila banwa agud man makapaidalom sa counseling kon nagasuprer sang HIV.
Nahibaluan nga halin 1986 tubtob Septyembre 2024, ang Iloilo ang may na-record nga 1,990 nga kaso sang HIV, kon sa diin, 249 ang nabalhag nga napatay.
