Gin-aprubahan na sang bicameral conference committee report para sa ginaduso nga P6.352 trillion nga 2025 national budget.
Ang nasambit nga report ang ginalakipan sang gintingob nga versions sang budget halin sa Senado kag House of Representatives.
Gin-finalize sang Kongreso ang national budget sa pagpanguna nanday Senate Committee on Finance chairperson Sen. Grace Poe kag House Committee on Appropriations chairman Rep. Zaldy Co.
Sa bahin sang Senado, wala napirma sanday Sen. Juan Miguel Zubiri, Sen. Bato dela Rosa, kag Risa Hontiveros.
Suno sa ila, wala sila nagpirma sa 2025 General Appropriations Bill (House bill 10800) bangud tun-an pa nila ang ginaduso nga pondo.
Samtang, ginkumpirma naman ni Hontiveros nga nagapabilin sa P733 million ang budget sang Office of the Vice President (OVP).
Suno naman kay Senate Pro Tempore Jinggoy Estrada, desisyon sang mayorya nga i-retain ang 2025 budget sang OVP.
Ini matapos napaslawan ang mga kaalyado sini nga depensahan ang iya P1.3-billion.
P39 billion naman ang pondo nga ginpain para sa Ayuda Sa Kapos ang Kita Program (AKAP) nga bulig sang Department of Social Welfare and Development (DSWD) para sa mga low-income kag minimum-wage earners nga apektado sang inflation.
Gindugangan naman ang pondo sa sektor sang ikaayong lawas, edukasyon kag disaster response, mangin ang para sa defense, justice kag transportation.
