𝗜𝗟𝗢𝗜𝗟𝗢 𝗖𝗜𝗧𝗬 – Ginpasidunggan sang Philippine National Volunteer Service Coordinating Agency ang flagship station sang Bombo Radyo Philippines nga Bombo Radyo Iloilo kag ang Chief of Reporters sini nga si Bombo Lynd-C Joy Bade sa Search for Outstanding Volunteers (SOV) 2024.
Ang awarding ang ginpatigayon sa Metropolitan Theater, Manila sa diin ginkilala ang mga indibidwal kag mga grupo nga may dako nga papel sa pagbulig sa isigkatawo.
Ginpangunahan sang National Economic and Development Authority (NEDA) ang nasambit nga pagpasidungog nga may tema: “Igniting Volunteer-Led Innovation for Future Growth and Social Transformation: Bolunterismo tungo sa Bagong Pilipinas.”
Kabahin ang pagpasidungog sa selebrasyon sang 2024 National Volunteer’s Month.
Para sa Radio Individual Youth Category – nakuha ni Bombo Lynd-C ang award bangud sa istorya sini kaangot sa bloodletting activity nga Dugong Bombo: ‘A Little Pain, A Life to Gain.’
Gindayaw naman ni National Economic and Development Authority Secretary Dr. Arsenio Balisacan ang mga ginpasidunggan.
