Ginpangkakas ang pila ka mga tarpaulins sa Brgy. San Rafael, Mandurriao, Iloilo City lakip na ang poster sang Team Sulong Gugma ni Iloilo City Lone District Representative Julienne “Jam-jam” Baronda.
Sa interview sang Bombo Radyo kay Mr. Love Joy Hosenilla, Head sang Task Force sang Anti-squatting and Illegal Structures Unit (ASIS-U), iya ginpahayag nga nakaagi na nila ginkakas ang mga posters sa lugar apang liwat naman subong sila nagbayolar.
Suno kay Hosenilla, sa idalom sang regulation ordinance number 2013 330, wala dapat sang mga streamer nga mahimo i-install ukon i-attach sa imprastruktura.
Gin-athag man sang natungdan nga ini ang kasuguan ang naghalin sa Office of the Building Official (OBO) kag ginpatuman lamang nila.
Nagpangayo man sang bulig ang talatapan sa City Engineering Office agud nga matigayon nga makakas ang tarpaulin.
