Nagpakig-angot ang Public Order and Safety Management Office (POSMO) sa City Environment and Natural Resources Office (CENRO) kag sa City Engineering Office agud nga masulosyonan ang mga suga sa Iloilo Esplanade 3.
Ini kasunod man sang may natukiban ang green guard sang Garden of Love sang duha ka mga lalaki nga nagahimo sang kamala-malahan.
Sa interview sang Bombo Radyo kay Ret. PCOL. Uldarico Garbanzos, head sang Public Order and Safety Management Office, iya ginpahayag nga nakapadala na ang talatapan sang sulat sa nasambit nga mga opisina agud nga mapabutangan sang dugang nga suga ang idalom sang Jalandoni Bridge bangud tuman gid ka dulom.
Suno kay Garbanzos, butangan man ang pila ka porsyon sang Esplanade 3 kag pagalimpyohan ang mga madabong nga hilamon agud nga indi na mahukmungan sang mga indibidwal.
Nagpasalig man ang natungdan nga mahawanan ang mga masi-ok nga bahin sang lugar agud nga malikawan nga masulit pa ang hitabo.
