Indi magduha-duha nga kakson kag utdon sang Iloilo City Engineers Office ang linya sang kable sang telecommunications company kon indi nila ini mahimos sa mga poste sa syudad.
Sa interview sang Bombo Radyo kay Mr. Joel Gerasmia, Head sang Task Force Public Utilities Group of Iloilo, iya ginpahayag nga padayon ang monitoring sang ila talatapan sa mga telco companies kon sa diin, amat-amat na man sila nagahulag.
Nagpaandam man ang natungdan nga ubrahon nila ang nagakadapat nga himuon kon mag-abot sa Lunes nga wala sa gihapon naubos panghimos sang telco ang ila mga linya nga nagakabod sa gihapon sa poste.
Ginpahayag man sini nga indi rason ang calle real market night agud indi matuman sang mga telco ang amo nga tikang.
Suno kay Gerasmia, “no mercy” ang ila ipatuman batok sa telco companies kon hinali nga wala sila sa gihapon sang may ginhimo sa ginhatag nga deadline.
Kon balikan, ginhatagan sang deadline ni Mayor Jerry Treñas tubtob December 16 ang mga telcos nga mahimus ang ila linya.
Madumduman nga may yara sang ordinansa ang syudad nga nagamando sang underground cabling sa bahin sa JM Basa Street.
Nakatalana naman isunod ang bahin sang Diversion sa underground cabling.
