Lakip sa makabaton sang Service Recognition Incentive (SRI) nga P20,000 ang mga manunudlo nga nagatrabaho sa gobyerno.
Ini pagkatapos nga gin-aprubahan ni Presidente Ferdinand Marcos Jr. ang Administrative Order No. 27 sang Disyembre 12, 2024.
Sa interview sang Bombo Radyo kay Dr. Ma. Luz De Los Reyes, Schools Division Superintendent, Iloilo City, iya ginpahayag nga ang P20,000 nga mabaton sang mga manunudlo ang may 20% nga tax deduction.
Suno kay De Los Reyes, sang nagligad nga tuig, P18,000 lang ang ila nabaton kon sa diin, ginbuhinan man sang tax, apang may mga yara man sang non-taxable.
Ginpahayag man sini nga luwas sa Service Recognition Incentive (SRI), makabaton man sang P5,000 Productivity Enhancement Incentive ang mga manunudlo.
Nahibaluan nga lakip sa makabaton sang bente-mil nga incentive ang Armed Forces of the Philippines (AFP) sa idalum sang Department of National Defense, kag uniformed personnel sang Philippine National Police, Bureau of Fire Protection, kag Bureau of Jail Management and Penology sa idalum sang Department of the Interior and Local Government, the Bureau of Corrections under the Department of Justice, the Philippine Coast Guard sa idalom sang Department of Transportation, kag ang National Mapping and Resource Information Authority sa idalom sang Department of Environment and Natural Resources.
