Nag-alokar sang masobra P2 billion nga pondo kag stockpiles ang Department of Social Welfare and Development (DSWD) agud buligan ang mga apektado sang paglupok sang Bulkang Kanlaon sa Isla sang Negros.
Gin-athag ni DSWD Assistant Secretary for Disaster Response Management Group Irene Dumlao nga ang mga resources amo ang:
P92.2 million ang standby funds sa central kag regional offices.
Kapin sa P1.1 billion sa food packs sa mga pamilya.
Kapin sa P891 million ang non-food kag dugang nga pagkaon.
Sa kabug-usan, ini ang nagalab-ot sa P2 billion suno kay Dumlao.
Tubtob subong nga adlaw, masobra P14.7 million na ang nahatag sang DSWD nga humanitarian assistance sa mga apektado nga pumuluyo.
Ang kalamidad nakaapekto sa masobra 10,000 ka pamilya ukon 42,000 ka mga indibidwal sa 25 ka mga barangay sa Rehiyon VI kag VII.
Sa mga apektado, 4,600 ka pamilya (masobra 15,000 ka tawo) ang nagatinir sa 28 ka evacuation centers sa apektado nga mga rehiyon.
Ang isa pa ka 1,100 ka pamilya (mga 3,900 ka tawo) ang temporaryo nga nagapuyo upod sa mga himata ukon ila mga abyan.
Padayon naman ang hugot nga koordinasyon sang DSWD sa mga local government units agud masiguro ang pagdul-ong sang ayuda kag monitoring sa mga evacuees.
Ginpasalig man ni President Ferdinand “Bongbong” Marcos Jr. ang publiko nga aktibo ang pagdumala sang gobyerno sa sitwasyon, sa diin ginmanduan sini ang Department of Budget and Management nga mag-release sang disaster funds.
Ang Department of Health (DOH) nagabantay naman sang mga kondisyon sa ikaayong lawas kag naga-address sang mga posible nga mga balatian nga may kaangtanan sa paglupok sang bulkan.
Nagapabilin naman sa high alert ang Armed Forces of the Philippines (AFP), Philippine National Police (PNP), kag Bureau of Jail Management and Penology (BJMP) sa Isla sang Negros.
