Ginmanduan ni President Ferdinand “Bongbong” Marcos Jr. ang Bureau of Customs (BOC) kag Department of Agriculture (DA) nga lagson ang mga smugglers sang agricultural goods kag pasakaan sang nagakaigo nga kaso batok sa ila, sa idalum sang bag-o nga laye.
Ini ang ginmando ni Marcos kasunod sang iya pag-inspeksyon sa P178.5 million nga balor sang nakumpiskar nga frozen mackerel sa Manila International Container Terminal (MICT) sa Tondo, Manila.
Nag-abot ang mackerel shipment sa 21 ka containers nga wala sang kinahanglanon nga clearance gikan sa Bureau of Fisheries and Aquatic Resources (BFAR).
Suno sa Presidente, ang kaso nga ipasaka batuk sa mga gina-alegar pag-smuggle sang frozen mackerel ang mangin labing una sa idalum sang Republic Act 12022 ukon Anti-Agricultural Economic Sabotage Act.
Suno sa Presidential Communications Office (PCO), nakumpiskar sang BOC ang P5.87 billion nga kontrabando nga produkto sa agrikultura halin Hulyo 2022 tubtob Nobyembre 2024.
Nagpasaka man ang ahensya sang 250 ka kaso angut sa mga produkto sang agrikultura humalin 2018 tubtob 2024 kon sa diin, ang kabug-usan nga balor sang sini nga mga butang naglab-ot sa P8.59 billion.
Sa 250 ka mga kaso, ang Bureau of Customs naka-log sang apat ka mga convictions.
