Magasugod na subong nga adlaw, Disyembre 15, ang ginakalangkagan nga mga aktibidad sa Regional State Colleges and Universities Athletic Association (RSCUAA) 2024.
Magalawig ini nga festival tubtub sa Disyembre 20 kun sa diin balantayan ang 42 sports events sa 22 ka nagkalain-lain nga venues.
Magatipon sa sini nga hampang ang ginabanta 3,500 ka mga atleta, coaches, administrators, organizers, kag mga opisyal nagikan sa 13 regional state universities.
Sa opening ceremony, lakip sa ginalauman amo sanday national athlete-turned-beauty queen Alexie Mae Brooks, Philippine Sports Commission consultant Dr. Raymundo Lapating, kag Commission on Higher Education (CHED) Regional Director Raul Alvarez.
Si Dr. Bobby Gerardo, presidente sang Northern Iloilo State University kag chair sang Regional Association of State Universities and Colleges (RASUC) VI, amo ang opisyal nga magadeklarar sang pagbukas sang mga hinampang.
Sa interview sang Bombo Radyo kay Dr. Herman Lagon, public relations chairperson sang RSCUAA 2024, iya ginpahayag nga ini ang labing-una nga tion nga maga-host ang Iloilo State University of Fisheries Science and Technology gani daku kag malawig man ang ila nga preparasyon.
Ginalantaw nga ini man ang katapusan nga tion nga maka-upod ang mga eskwelahan halin sa Negros Occidental matapos ang ginbalay nga Negros Island Region Act nga amo ang nagaseparar sang amo nga probinsya gikan sa Western Visayas.
Sang nagligad nga tuig, nagkampyon ang Iloilo Science and Technology University, ginsundan sang West Visayas State University, kag nagsunod naman sa overall medal count ang Guimaras State University, University of Antique, State University of Northern Negros, ISUFST, kag Capiz State University.
Ginatos naman ka uniformed police officers kag iban pa nga personnel ang gindeploy sa nagkalain-lain nga venue agud nga mapasiguro ang katawhay kag seguridad sang mga magapasakop.
(Photo: ISUFST)
