Nagpahanumdom ang Archdiocese of Jaro sa publiko nga mag-obserba sang nagakaigo nga panapton sa tion nga magtambong sang Misa de Aguinaldo.
Sa interview sang Bombo Radyo kay Rev. Father Angelo Colada, Director sang Archdiocesan Commission on Social Communication, iya ginpahayag nga ang desisyon ang yara sa gihapon sa mga tawo, apang sila bilang isa ka simbahan, magpahanumdom lang sila sang mga nagakaigo nga panapton.
Suno kay Colada, likawan anay ang pagsuksok sang mga skinny jeans ukon mga mapikit nga mga panapton ilabi na kon ini ang malip-ot.
Mas makapamaayo suno sa natungdan ang magsuksok sang bistida para sa mga kabainhan.
Nagpanugyan man ini nga likawan ang pagsuksok sang mga shorts ukon jersey.
Ginpahayag man sini nga bilang isa ka matured nga indibidwal, nagakaigo lamang nga obserbahan ang ‘proper attire’ sa pagsimba.
