Gin-athag ni Janiuay, Iloilo Sangguniang Bayan Member James Adelantar nga nagsugod ang masingki nga pagsabtanay sa budget hearing para sa Fiscal Year 2025 sang Janiuay sang nagsabat si Municipal Disaster Risk Reduction and Management Office-OIC Jojo De Paula kay Sangguniang Bayan Member Atty. Mayen Mar Gulmatico samtang nagapadayon ang hearing.
Sa interview sang Bombo Radyo kay SB Adelantar, iya ginpahayag nga una nga ginsaway si De Paula ni Vice Mayor Corel Hannah Locsin-Yap nga indi magsaligbat samtang wala man ini gina-istorya ukon ginapamangkot.
Suno kay Adelantar, ini man ang nangin rason ko ngaa nagpaandam siya nga i-declare ini out of order kun mapadayon pa sang saligbat si De Paula.
Ginpahayag man sini nga ang ginpamangkot lamang ni Gulmatico kon ngaa kinahanglan nga maglisensya gid sa utod ni De Paula kon maggamit sang mga heavy equipment.
Gin-athag man sang natungdan nga ang punto lamang ni Gulmatico sa iya pagpamangkot amo agud masabat ang mga palamangkutanon man sang pila ka mga punong barangay kon sila ang nagagamit sang heavy equipment.
Ginklaro man ni Adelantar nga wala gid sang labot si De Paula sa deliberation nga natabo bangud nagtambong lang ini bangud man sa ang masunod nga diskusyonan, ang budget sang iya opisina.
Nahibaluan nga ang hearing ang may tuyo nga diskusyonan ang proposed budget sang Office of the Municipal Engineer sang Janiuay, Iloilo.
