Matapos ang isa ka dekada nga pagtinir sa presuhan sa Indonesia, makapauli na gid man si Mary Jane Veloso sa Pilipinas sa Miyerkules sang aga, Disyembre 18.
Santo sa kumpirmasyon sang Department of Foreign Affairs (DFA), 12:50 sa kaagahon ang oras sang paghalin sang eroplano sa Jakarta sakay ang convicted overseas Filipino worker (OFW) kag ginalauman nga magahugpa sa Manila 6:00 sang aga.
Sa statement naman sang Malacañang paagi kay Executive Secretary Lucas Bersamin, ginpahayag nga tuman gid ang apresasyon kag pagpasalamat sang Pilipinas sa Republika sang Indonesia sa pagpahanugot nga makabalik sa pungsod si Veloso.
Suno sa palasyo, ang homecoming sang Pinay amo ang bunga sang masobra isa ka dekada nga diskusyon, konsultasyon, kag diplomasya.
“Duty-bound as we are to honor the conditions for her transfer to the Philippine jurisdiction, we are truly elated to welcome Mary Jane back to her homeland and family, from whom she has been distracted for too long,” suno kay Bersamin.
Si Veloso, 39, ang yara sa death row sa amo nga Asian country bangud sa ginaalegar nga drug trafficking matapos nadakpan nga may sulod nga 2.6 kilos nga iligal nga droga ang iya luggage sang nag-abot siya sa Yogyakarta sang 2010.
Sang 2015, si anay Indonesian President Joko Widodo ang nagpahayag nga naghatag lamang ang ila gobyerno sang “temporary reprieve” kay Veloso gikan sa iya kuntani natalana nga execution bangud sa ginaalegar tuyo nga pagpalusot sang iligal nga droga.
Sang Enero sini nga tuig, nagpadala ang pamilya Veloso sang mga sulat kanday former President Widodo kag Philippine President Ferdinand Marcos, Jr. para i-apelar ang clemency para sa Pinay nga ginpahayag biktima lamang sang sirkumstansya.
Sang Nobyembre, ginkumpirma ni Marcos nga nakalab-ot na ang Manila kag Jakarta sa kasugtanan nga isaylo si Veloso sa Pilipinas. Ginpasalamatan sini si Indonesian President Prabowo Subianto kag iya gobyerno sa maayo nga panimuot.
Sa pihak nga bahin, sanday Cesar kag Celia nga ginikanan ni Mary Jane ang nag-apelar man sa gobyerno sang Pilipinas nga i-transfer ang ila bata sa safe local facility bangud sa kahangawa nga may mga pamahog halin sa international drug syndicate nga nag-implicate sa iya.
Kun balikan ang mga hitabo antes sini, may mga kaso na nga human trafficking kag large-scale illegal recruitment nga na-file batok sa traffickers ni Veloso nga sanday Julius Lacanilao kag Cristina Sergio sa Regional Trial Court sang Nueva Ecjia. Sang 2020, nagdagdag ang korte sang guilty verdict sa illegal recruitment case sa recruiters apang pending pa subong ang kaso nga trafficking.#
