Nagapangduha-duha si Pavia, Iloilo Sangguniang Bayan Member Roy Gorriceta nga mabuksan sa full capacity ang Ungka Flyover sa Disyembre 25, 2024.
Sa interview sang Bombo Radyo kay SB Gorriceta, iya ginpahayag nga kun bisitahan mo ang area ukon ang flyover, madamo pa sang dapat nga ulubrahon.
Suno kay Gorriceta, ini na ang ika-anom nga promisa sang Department of Public Works and Highways (DPWH) Region 6 nga buksan ang flyover tubtob nakalab-ot subong nga 2024.
Gin-ako man sini nga nakapoy na sila nga mga opisyal ang magbaton sang basol kag nakapoy naman sang hala ka sabat sa mga reklamo sang motorista.
Wala man mapunggan ni Gorriceta nga ipabutyag nga gainit na ang ila ulo sa liwat-liwat nga promisa sang DPWH.
Nagpanawagan man ini sa talatapan nga ubrahon nila ang ila responsibilidad bangud bilang opisyal, ubrahon man nila ang nagakadapat nga tikang.
Nagpaathag naman ang Department of Public Works and Highways (DPWH) Region 6 nga kahapon lang nila nabaton ang sulat.
Suno kay Engineer Ormel Santos, Representative sang Department of Public Works and Highways (DPWH) Region 6, iya ginpahayag nga madamo sila sang gintambongan nga meeting kahapon nga adlaw rason man nga wala sila nakatambong sang session.
Apang, nagpasalig man ini nga makakadto ang ila talatapan sa Sangguniang Panlalawigan agud diskusyonan ang flyover.
Nagalaum naman si Iloilo 2nd District Board Member June Mondejar nga indi na masulit pa ang natabo.
Ginmanduan man sini SB Gorriceta nga kon matabo nga indi makatambong liwat ang DPWH 6, maghimo na lang sa resolusyon nga naga-request sang transfer sang DPWH Officer agud nga masuportahan sang Sangguniang Panlalawigan.
