Ginalauman nga mapasaka ang legal nga kaso batok sa construction worker nga nagbuno-patay sa pulis sa Brgy. Pakiad, Oton, Iloilo.
Ang biktima amo si Police Staff Sergeant Erwin Calubayan, sang Criminal Investigation and Detection Group (CIDG) Iloilo, kasado, kag residente sang Brgy. Balabag, Dumangas, Iloil.
Ang suspek naman amo si, Alyas Dan, 40-anyos single, construction worker kag residente sang Barangay Siniba-an, Dingle Iloilo.
Sa interview sang Bombo Radyo kay Police Lieutenant Marlon Ayson, Deputy Commander sang Criminal Investigation and Detection Group (CIDG), iya ginpahayag nga ang biktima ang may gina-monitor sa 1st District sang Iloilo bangud ini ang iya role bilang katapo sang CIDG.
Suno kay Ayson, ‘on duty’ si Calubayan sang natabo ang insidente bangud yara ini sa idalom sang iya command kasunod sang ila dispatch.
Gin-athag man sini nga bilang deputy commander, nagabilin gid ini sa ila katapo nga ubrahon ang ila trabaho.
Wala naman ini nagkomento sa anggulo nga posible selos ang gintunaan sang krimen.
Una na nga ginpaguwa sang Oton Municipal Police Station (MPS) nga lunsay nagapangaluyag ang biktima kag suspek kay Alyas Donna kag una nga bes nga nagsumalangay ang mga ini sa tyangge kon sa diin nagluntad ang insidente.
Nahibaluan nga nakaagum sang ‘stab wound’ ang biktima sa tu-o nga porsyon sang iya tyan kag gilayon nga gindala sa ospital apang ginbawian sang kabuhi, samtang, nakaagum naman sang ‘gunshot wound’ ang suspek.
