Gin-report sang Department of Trade and Industry (DTI) nga nalapawan na sini ang ila investment targets para sa Pilipinas sa 2024.
Sa statement sang ahensya, nakasaad nga gin-aprubahan sang Board of Investments (BOI) ang investments nga nagadangat sa P1.62 trillion nga mas mataas sa P1.26 trillion nga gin-aprubahan sang 2023. Lapaw man ini sa P1.5 trillion nga target sang ahensya para sa ila kaugalingon.
Sa pihak nga bahin, gin-aprubahan naman sang Philippine Economic Zone Authority (PEZA) ang P214.17 billion sa investments nga lapaw sa P200 billion nga target para sa tuig.
Suno kay Trade and Industry Acting Secretary Ma. Cristina Roque, padayunon sang ahensya ang pagpatuman sang mga polisa nga nagaganyat sa mga investment sa dalagku nga mga industriya sa pungsod.
Paagi sa sini, ginalantaw nga magapabilin ang Pilipinas bilang nagapanguna nga kaladtuan para sa innovation kag pagtubo.
Kun balikan, sang Nobyembre, ginpirmahan ni President Ferdinand Marcos Jr. ang layi sa ginaduso nga pag-amyendar sa corporate taxes kag incentives sa pungsod nga ginalauman nga magapasanyog pa sa Pilipinas bilang investment destination.
Matandaan nga napilian ang Pilipinas bilang isa sa 50 ka mga ekonomiya nga magapasakop sa new Business Ready Report sang World Bank.
