Nagdangat na sa 100 ka mga soldado sang North Korea ang napatay kag 1,000 naman ang nasamaran samtang nagabulig sa Russia sa giyera batok sa Ukraine.
Santo ini sa alegasyon sang miyembro sang parliament sa South Korea nga si Lee Sung-kwon matapos ang briefing sang National Intelligence Service sang Seoul.
Suno kay Lee, nalakip sa casualties amo ang high-ranking officials.
Posible suno sa natungdan nga napatay sila paagi sa drones ukon bangud man sa kakulang sa ihibalo sa mga pil-as sa mga lugar nga may gyera.
Subong lang nga semana nagguwa ang impormasyon nga may yara na sang mga napatay halin sa tropa nga ginpadala ni North Korean leader Kim Jong Un.
Kun matandaan, Oktubre sang gin-report nga halos 10,000 ka mga soldado ang nagbiya halin sa Pyongyang agud magkadto sa Moscow kag buligan sanday Russian president Vladimir Putin.
Sa Estados Unidos, may yara sang kumpirmasyon halin sa Pentagon nga may North Koreans gid man nga nagkalamatay sa gyera batok sa Ukraine apang wala gindetalye kun pila ang casualties.
Ginapatihan nga antes pa man ginpasulong sa giyera, nagtinir anay ang North Korean troops sa Russia para sa training kag sa support roles. Ginapatihan naman nga nagkalamatay ang iban sa ila sa Kursk nga amo ang rehiyon kun sa diin nagapunsok man ang Ukrainians agud depensahan ang ila gamay nga teritoryo.
Sang tinalikdan nga weekend, matandaan nga nagpaguwa sang statement si Ukrainian President Volodymyr Zelensky nga naggamit na ang Russia sang “significant number” sang North Koreans sa ila pagpang-atake sa Kursk.
