Nasiplatan ang 12 ka mga barko sang China sa vicinity sang Bajo de Masinloc ukon Scarborough Shoal sa West Philippine Sea.
Suno sa Philippine Coast Guard (PCG), na-obserbaran ini kadungan sang ila routine maritime patrol kag aerial surveillance kaupod ang Bureau of Fisheries and Aquatic Resources (BFAR) sa amo nga lugar.
Duha sa ila nakita amo ang China Coast Guard vessels (3106 kag 3104) nga naka-posisyon sa guwa sang Bajo De Masinloc kag ang pito ka Chinese maritime militia vessels sa nagapalibot nga katubigan.
May yara man sang duha ka maritime militia vessels sa sulod mismo sang shoal nga naga-monitor sang access routes sa area, samtang ang isa ka People’s Liberation Army Navy (PLAN) vessel nga may bow number 552 ang nahamtang 50 nautical miles halin sa baybayon sang Zambales.
Sa pihak nga bahin, sa patrol operation naman sang PCG paagi sa BRP Teresa Magbanua kag BRP Cabra, napanagtag ang food packages kag groceries sa mga Pilipino nga manugpangisda nga yara sa lugar. Suno sa PCG, nagdangat sa 40 Filipino fishing boats ang ila nakit-an nga nagapangisda kadungan ang ila pagpatrolya.
Matandaan nga sa rotation and reprovisioning (RORE) missions sang Philippine Navy sa siyam ka mga isla sa West Philippine Sea subong man nga Disyembre, may nakit-an man ini nga apat ka Chinese vessels malapit sa Ayungin (Second Thomas) Shoal apang wala sang makatalagam nga insidente nga nagluntad.
