Ginaplano sang Iloilo City government nga ipaidalum sa random drug testing ang mga bouncers sa tagsa ka bar sa Iloilo City.
Sa interview sang Bombo Radyo kay Atty. Ricardo Escanlar III, Legal sang Iloilo City Mayors’ Office, iya ginpahayag nga ang ginpatuman nga pagsinapol kaupod ang tag-iya sang mga balay-kalingawan ang isa ka paagi agud makuha ang ila simpatiya sa ginaduso nga tikang.
Suno kay Escanlar, magakoordinar man sila kay Mayor Jerry Treñas agud ipahibalo ang ila nangin plano kaupod ang Iloilo City Police Office (ICPO).
Ginpahayag man sang natungdan nga padayon nila i-incorporate ang mga sentyemento sang bar owners agud ma-finalize ang executive order sa Enero 2025.
Gin-ako man ni Escanlar nga ginalantaw nila nga ipatuman ang drug testing kada bulan apang, mas luyag sang kadam-an ang quarterly.
Positibo nga ginbaton sang Iloilo Bar Owners Association ang ginaduso nga tikang sang city government nga random drug testing sa mga bouncers sang mga bar sa Iloilo City.
Suno kay Jim Velez, Presidente sang Iloilo Bar Owners Association, iya ginpahayag nga importante para sa ila ang peace and order agud mapabilin nga malinong kag matawhay ang tagsa ka balay-kalingawan sa syudad.
Pahayag ni Velez, responsibilidad sang tagsa ka bar nga ipabilin nga safe kag hilway sa indi manami nga hitabo ang mga customer.
Nagalaum man ini nga maintindihan sang mga nagapanag-iya sang bar ang mga tikang ilabi na para sa mga bag-ohanon nga balay-kalingawan.
Nagpasalig man si Velez nga magatrabaho sang ‘hand in hand’ kaupod ang mga owners agud nga mapatuman ang nasambit nga tikang.
