Nagpaathag ang Bangko Sentral ng Pilipinas (BSP) sa pagkakas sang imahe sang Philippine heroes sa bag-o nga series sang polymer banknotes nga ginsapubliko sang nagligad lamang nga adlaw.
Suno kay Atty. Sarah Severina Curtis, director sang BSP Banknotes and Securities Production Management Department, ang mga picture sang mga baganihan ang ginkakas sa bag-o nga P500, P100 kag P50 banknotes apang magapabilin man ang mga ini sa paper banknotes.
Sa baylo nga nawong sang mga baganihan, naka-feature sa bag-o nga banknotes ang mga sapat kag ang traditional local weave designs. Lakip sa mga sapat amo ang Visayan spotted deer, Palawan peacock pheasant kag whale shark nga patimaan suno sa central bank sang rich biodiversity sa Pilipinas ukon ang presensya sang endemic kag endangered species sa Pilipinas.
“‘Yung sa heroes…wala pong pagtanggal. Dagdag lang ito sa mga disenyo sa banknotes. We want to also feature what other elements of Filipino identities are (sic) Bukod sa heroes, we are also known for our rich biodiversity kasi ,so ‘yung mga endemic, endangered species unto naman natin I-feature,” pahayag ni Curtis.
Dugang sini, kun i-feature ini nga endangered animals, mas magasangkad ang ihibalo sang publiko nga kinahanglan ang paghatag sang proteksyon sa palibot kag sa dunang-manggad.
Bangud sini nga mga pagbag-o sa bag-o nga banknotes, wala na ang imahe nanday former president Corazon Aquino kag bana sini nga si former Sen. Benigno “Ninoy” Aquino Jr., amo man ang former presidents nga sanday Sergio Osmena kag Manuel Roxas.
Sang ginpamangkot kun ano ang matabo sa nawong ni Cory Aquino, sabat ni Curtis: “Dito sa polymer banknotes, hindi po natin siya nai-feature pero we want to ensure na circulating pa rin po ang ating papel na banknotes. In terms of ratio, mas marami pa rin ang paper banknotes.”
Una na nga nag-reklamo ang August Twenty-One Movement (ATOM) nga ini ang una nga tion sa maragtas nga indi mga baganihan ang naka-feature sa designs sang Philippine currency.
Mangin si Senator Francis “Chiz” Escudero ang nagpahayag man nga luyag sini nga magpa-athag ang BSP kun ngaa ginkakas ang historical figures sa kuwrata sang Pilipinas.
“The BSP, by law, is authorized to do that. However, it does carry with it the responsibility to explain and be accountable regarding whatever changes it has or will do. Am awaiting, together with a lot of curious people and with bated breath the reason and annotation of the changes,” pahayag sang senate president.
Ini nga bag-o nga polymer banknotes ang iga-release na sa limited quantities lamang umpisa sa Lunes, Disyembre 23.#
