Ginpasigurado sang Iloilo City Government nga ginatrabaho na sang mga empleyado sa opisina sang budget kag accounting ang mga rekisitos agud nga ma-release na ang bonus sang mga city hall employees antes ang paskwa.
Sa interview sang Bombo Radyo kay Ms. Joy Fantilaga, Spokesperson ni Iloilo City Mayor Jerry Treñas, iya ginpahayag nga peparado na ang pondo sang Iloilo City Government para sa service recognition incentives (SRI) kag gratuity pay sang mga empleyado sang Iloilo City Hall subong nga Disyembre.
Suno kay Fantilaga, ginahulat-hulat na lang ang gratuity pay nga maguwa agud nga pati ang job order (JO) nga empleyado ang may mabaton man.
Ginpahayag man sini nga overtime ang mga yara sa budget office agud mapasigurado nga mahatag ang mga bonuses sa mga empleyado.
Nagpasalamat man ang alkalde sa mga indibidwal nga nagbulig agud mapadasig ang release sang service recognition incentives.
