Patay ang driver sang motorsiklo matapos nakabunggo sa depampasahero nga jeep sa Brgy. Poblacion, New Lucena, Iloilo.
Ang driver sang motorsiklo amo si Ark Lumano Pisalbon, 37-anyos, kasado, kag residente sang Brgy. Castellano, Calatrava, Negros Occidental, samtang ang driver sang jeep naman amo si Leonard Cornita Alberto, 42-anyos, residente sang San Leonardo (Cabarroguis), Aglipay, Quirino.
Sa interview sang Bombo Radyo kay PCpl. Greg Gonce, imbestigador sang New Lucena Municipal Police Station, iya ginpahayag nga nagliko pa-wala ang jeep agud magkagto sa terminal apang gulpi lang nagbunggo ang motor nga suno sa mga nakakita, madasig ang pagpadalagan sini.
Nakaagum sang pilas sa nagkalain-lain nga parte sa lawas ang biktima kag patal nga pilas sa iya ulo nga gintunaan sang iya kamatayon.
Suno sa kapulisan, nag-aregluhanay ang driver sang jeep kag pamilya sang driver sang motorsiklo kag wala na sang plano nga magpasaka sang kaso.
