Mas gin-istriktuhan sang Department of Trade and Industry-Fair Trade Enforcement Bureau (DTI-FTEB) ang monitoring sa uncertified fireworks samtang nga nagahilapit ang Bag-ong Tuig.
Ini kasunod sang apelar halin sa legal firecracker manufacturers nga mas huguton sang otoridad ang pagpatuman sang pagsulundan batok sa pagbaligya sang iligal ukon wala na-certify nga mga produkto.
Pahayag sang bureau, sa kada may madakpan sila nga nagalapas nga manufacturers, maga-isyu sila sang cease and desist orders kag may yara pa sang special law nga amo naman ang iga-enforce ang mga pulis kaangot naman sa criminal aspect.
Nagpasalig man ang bureau nga nagapakig-angot sila sa Philippine National Police (PNP) kag sa local government units (LGUs) kaangot naman sa mga ordinansa kag designated areas para sa pag-display kag pagbaligya sang certified firecrackers.
Una naman nga nagpanawagan si DTI Secretary Cristina Aldeguer-Roque sa consumers nga magbakal lamang sang certified fireworks para sigurado nga safe subong nga holiday season. May nabalhag naman ang Bureau of Philippine Standards ang comprehensive list sang certified fireworks sa website sang DTI.
Sa bahin naman sang Department of Labor and Employment (DOLE), ginpahanumdom sa mga establisyemento sa pyrotechnics industry nga istrikto nga magsunod sa Occupational Safety and Health Standards.
Base sa Labor Advisory No. 15 nga gin-isyu sini nga weekend, ginsiling nga katungdanan sang mga kumpaniya nga siguruhon nga safe ang ulubrahan para sa tanan nga workers.
Ginmanduan man ang regional directors sang ahensya nga magpasa sang lista sang mga establisyemento nga ila nga na-monitor sa Bureau of Working Conditions antes ang Enero 10, 2025.
