Gin-ako sang Iloilo City Traffic Management Unit (ICTMU) nga ginalauman na nila nga magapug-ok ang trapiko sa pila ka bahin sang Iloilo City Proper kasunod man sang road closure sa Muelle Loney St.
Ini bangud man sa ginpatigayon nga gift giving activity sang city government sa Freedom Grandstand.
Sa interview sang Bombo Radyo kay Ret. PCOL. Uldarico Garbanzos, Head sang Iloilo City Traffic Management Unit, iya ginpahayag nga madamo sang contributory factors kon ngaa nagpug-ok ang trapiko.
Lakip na diri ang rush hour nga masami nagatuga sang paggutok kag paghinay sang traffic.
Suno kay Garbanzos, nabatyagan ang mahinay nga dalagan sang trapiko sa JM Basa St., Iznart St., kag padulong sa Iloilo Provincial Capitol.
Nabalhag naman sang talatapan ang duha ka mga vehicular accident nga natabo sa Rizal St. kag Delgado St. nga nagtuga man sang huol sa trapiko kag motorista.
Nagpakig-angot naman ang ICTMU sa Public Order and Safety Management Office (POSMO) sa pagpatuman sang crowd control sang mga nagtambong sang gift giving sa Freedom Grandstand.
