𝗜𝗟𝗢𝗜𝗟𝗢 𝗖𝗜𝗧𝗬 – Patay ang isa ka lalaki matapos nabungguan sang 10-wheeler truck nga may karga nga balas sa Iloilo Radial By-Pass Road 4, Barangay Lanit, Jaro, Iloilo City.
Sa interview sang Bombo Radyo kay Ronald Lara, 45-anyos, residente sang Passi City kag nagamaneho sang truck, iya ginpahayag nga naghalin pa ini sa banwa sang San Enrique, Iloilo kag padulong na ini kuntani sa Lapuz, Iloilo City agud magsakay sa Roll-on/roll-off vessel padulong sa Guimaras Island.
Suno kay Lara, madasig ang pagpadalagan sang biktima sa iya motorsiklo kung sa diin pag abot sa utod nga dalan, nagliko-liko ini kag nag-igo sa unahan nga bahin sang truck.
Ginyudyod pa ini sang truck sa kalayuon nga 30-metros sa diin nawasak gid ang iya ulo.
Nagkalawasak man ang dala niya nga mga pasta kag macaroni nga ihanda pa kuntani sa tion sang paskwa.
Gindala naman ini sa hospital sa siyudad sang Iloilo, apang gindeklarar nga dead on arrival.
