Magataas ang iga-import nga mais sang Pilipinas sang 7.2 percent ukon pasaka sa 1.63 million metric tons (MMT) para sa marketing year (MY) 2024-2025 agud malab-ot ang nagataas man nga demand sang domestic animal feed industry.
Suno sa United States Department of Agriculture-Foreign Agricultural Service sa Manila, ginapanan-aw man nga ang corn production sang pungsod ang magatubo sang 0.4 percent ukon pasaka sa 8.15 million metric tons halin sa 8.119 million metric tons sang 2023-2024.
Gindugang pa diri nga ang amat-amat nga pagpadamo sang baboy samtang nagahulat sa commercialization sang African swine fever (ASF) vaccine ang makapataas pa gid sang demand para sa imported feed corn sa ulihi nga parte sang 2024-2025.
Ginpataas man ang forecasts sang feed kag residual use sang 2.7 percent sa 7.6 million metric tons halin sa 7.4 million metric tons.
Samtang, ginsiling man sang ahensya nga magataas ang food, seed, kag industrial consumption sa 1.4 percent ukon magasaka sa 2.23 million metric tons halin sa 2.20 million metric tons bangud sa increased demand para sa corn-based food snacks kag byproducts, kaangay sang cornstarch, oil, kag syrup.
