ILOILO – Nakarekord ang Iloilo Police Provincial Office sang lima ka mga aksidente sa dalanon humalin kahapon Disyembre 24 tubtob kaina sang kaagahon, Disyembre 25 — adlaw sang Paskwa.
Sa interview sang Bombo Radyo kay Police Major Rolando Araño, Spokesperson sang Iloilo Police Provincial Office, iya ginpahayag nga may mga insidente man nga may kaangtanan sa makahulubog nga ilimnon nga nagresulta sang tatlo ka mga physical injuries.
Nagpangabay ang natungdan sa publiko nga bangud madamo sang parties nga ginaselebrar, indi gid malikawan nga may inom-inom apang dapat dumdumon nga hagan-hagan lang ang pag-inom ilabi na kun magamaneho pa sang salakyan ukon motorsiklo.
Suno sa iya, kun kaisa, makahulubog nga ilimnon man ang rason sang pagbinaisay gani dapat palawigon gid ang pasensya kag indi na pagpadakuon pa ang gamay nga issue.
Mas maayo dugang sang natungdan nga magkinasadya nga malinong kag wala sang gamo.
