Pito ka mga simbahan ang gindesignar sang Archdiocese of Jaro bilang pilgrimage churches may kaangtanan sa selebrasyon sang Jubilee year sa 2025.
Sa interview sang Bombo Radyo kay Rev. Fr. Angelo Colada, director sang Commission on Social Communications sang Archdiocese of Jaro, iya ginpahayag nga mismo si Most Reverend Jose Romeo O. Lazo, D.D., ang arsobispo sang Jaro, amo ang nagpili sang mga pilgrimage churches.
Ini ginalakipan sang mga masunod: Jaro Metropolitan Cathedral nga amo ang National Shrine of Our Lady of Candles Parish; St. Nicholas of Tolentino Parish sa Cabatuan; St. Michael the Archangel Parish sa San Miguel, Jordan, Guimaras; St. Thomas of Villanova Parish sa Miagao; Patronage of St. Joseph Parish sa Pototan; Sts. Peter and Paul Parish sa Barotac Viejo; Holy Rosary Chapel sang Dominican Sisters of the Most Holy Rosary of the Philippines sa Molo, Iloilo City
Suno kay Colada, ang pagbisita sa sini nga mga simbahan ang isa ka pamaagi agud liwat nga mapasanyog pa ang relasyon sang tawo sa Diyos, sa iya isigkatawo kag sa kalibutan.
Ginapangabay man sang simbahan ang paghimo sang corporal works of mercy.
Ang corporal works of mercy ginalakipan sang pagpakaon sang mga ginagutom, pagpainom sang ginauhaw, pagpabayo sa mga nagahublas, paghatag sang balay sa wala sang ilistaran, pagbisita sa mga nagamasakit, pagduaw sa mga nabilanggo, kag paglubong sa mga nagtaliwan.
Patigayunon ang pagbukas sang sini nga mga simbahan para sa selebrasyon sa Disyembre 29 kadungan sang Feast of the Holy Family.
Matandaan nga sang Disyembre 24 sang ginbuksan ni Pope Francis ang Holy Door sa Vatican nahanungod sa selebrasyon nga ang tema nakasentro sa paglaum.
Ang Jubilee year ginaselebrar sang simbahan sa kada 25 ka tuig.
