Nakapalagyo ang isa sa duha ka mga babaye nga nadakpan sa ginpatigayon nga drug buy bust operation sa Barangay East Baluarte Molo, Iloilo City.
Lakip sa nadakpan amo ang jobhire nga si Arien Cadiz De La Peña, residente sang nasambit nga barangay kag Jennifer Marifosque, residente sang Santo Niño Sur, Arevalo.
Sa interview sang Bombo Radyo kay Punong Barangay Nestor Espinosa sang Santo Niño Sur, Arevalo, iya ginlaragway nga “estranghero” ang pangalan ni Jennifer Marifosque nga isa man sa mga nadakpan bangud wala ini nakabalhag sa ila lista nga residente ini sang ila lugar.
Suno kay Espinosa, posible sa ila nga lugar nagapuli ang subject apang naga-board lang.
Ginkakibot man sang punong barangay nga residente si Marifosque sang ila lugar bangud masami kilala niya ang halos mga tawo sa ila lugar.
Suno naman kay Police Captain Ryan Christ Inot, Head sang City Drug Enforcement Unit (CDEU), sang gindala sa Molo Police Station ang duha ka mga babaye, naglisensya si Marifosque nga magkadto sa CR sa diin yara ini nahamtang sa ika-duha nga panalgan sang police station.
Ini kasunod man sang pagreklamo sini nga nagasuka bangud nagasakit ang iya tiyan.
Ginpahayag man ni Inot nga sang yara na sa CR ang subject, ginpahanugutan na lang nila nga isirado ang pwertahan bangud man sa gender sensitivity ilabi na nga lalaki ang pulis nga bantay.
Sa mo nga tion, naglumpat halin sa bintana si Marifosque agud makapalagyo kon sa diin, ginpaandar pa sini ang gripo agud indi mabatian.
Naggamit naman ang subject sang pulungkuan agud makasaka sa bintana nga gin-agyan sini sa pagpalagyo.
Ulihi nakit-an sa closed circuit television (CCTV) ang subject nga nagsulod sa isa ka mall apang gilayon man nga naguwa.
Sa subong, padayon nga ginapangita sang kapulisan ang nagpalagyo nga babaye.
Nahibaluan nga nakuha ang 120 grams nga ginapatihan illegal drugs nga may yara sang market value nga ₱816,000 sa duha ka subject lakip na ang nakapalagyo.
