Ginpa-intensify sang Iloilo City Police Office (ICPO) ang ila kampanya batok sa mga boga ukon improvised cannon sa syudad subong nga nagahingapos na ang 2024.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginpahayag nga masobra 30 na ka mga boga ang ila nakumpiskar pila ka adlaw antes magbag-ong tuig.
Suno kay Sangrines, may kabug-usan nga 34 ka mga boga ang ila nakuha kon sa diin, 1 ang nakuha sang Iloilo City Police Station 1, lima naman sa Iloilo City Police Station 2, tatlo sa Station 3, anom sa Station 5, isa sa station 6, samtang lima sa Station 7, kag 13 naman sa Station 8.
Gin-athag man sini nga ang mga nasambit nga numero ang tendency pa nga magsaka kon padayon nga magagamit ang mga indibidwal ilabi na ang kabataan sang improvised cannon.
Nag-apelar man si Sangrines sa publiko, barangay officials, ginikanan, kag pumuluyo nga magpamuno sa pagsaway sang mga tawo nga nagagamit sang boga agud nga malikawan ang disgrasya sa pagsug-alaw sang bag-ong tuig.
