Kakason sang Department of Agriculture (DA) ang brand labels nga nakapaskil sa imported rice sa mga merkado agud nga matapna ang ginaalegar nagakatabo nga manipulasyon sa presyo.
Suno kay DA Secretary Francisco Tiu Laurel Jr., sakop sini nga plano ang “premium” kag “special” imported rice labels nga amo ang ginagamit sa pag-justify sang pagsaka sa presyo.
Sa ila pagbisita sa mga merkado suno kay Laurel, natukiban nila nga may mga retailers kag traders nga hungod nga nagapatalang sa mga manugbakal bangud ginatapikan nila sang label nga branded imports ang baligya nga bugas para nga mapahangop sa kustomer kun ngaa mataas ang presyo.
Suno sa tiglikom, indi nila pagdal-on ang local rice sa kakasan sang brand label agud nga maproteksyunan ang farmers kag traders.
Disyembre 19 sang naglibot ang DA kag ang Department of Trade and Industry (DTI) sa mga mercado para sa inspeksyon.
Posible naman suno kay DA Assistant Secretary Arnel de Mesa nga umpisahan nila sa pagpatuman ang ila plano sa masunod nga tuig.
Ang iban pa nga plano amo ang pagpanuno sang presyo sang imported rice lakip na ang pag-invoke sang food security emergency sa idalom sang amended Rice Tariffication Law. Paagi sa sini, matugutan ang pagguwa sang buffer stocks halin sa National Food Authority (NFA).
Ginalantaw man ang possible rice importation sang Food Terminal Inc. (FTI) agud nga maka-compete sa private importers.
