ILOILO – Nagapatigayon sang random inspection ang Philippine National Police sa mga nagabaligya sang palupok sa Western Visayas agud masiguro nga legal nga firecrackers lang ang ginabaligya.
Sa interview sang Bombo Radyo kay PLt. Col. Arnel Solis, Spokesperson sang Police Regional Office 6, iya ginpahayag nga ang Regional Civil Security 6 amo ang nagapatigayon sang inspeksyon sa store owners kun otorisdado kag kun may lisensya ang dealer ukon retailer sa pagbaligya sang firecrackers kag pyrotechnics.
Suno kay Solis, kinahanglan nga naka-comply sang requirement ang manugbaligya sang palupok halin sa Bureau of Fire Protection, Philippine National Police kag Local Government Unit.
Sa tion nga may madakpan ang kapulisan nga nagabaligya sang illegal firecrackers, mahimo ini nga ma-confiscate sang otoridad bangud makatuga ini sang halit sa mga tawo ilabi na ang pagkapilas, pagkabulag ukon pagkabungol.
Isa man sa hugot nga ginakampanya sang kapulisan amo ang pagdumili sa paggamit sang boga nga amo ang ginahimo nga alternatibo sang kadam-an sa pagpalupok.
Pahayag ni Solis, naga-coordinate mismo ang Police Regional Office 6 sa mga barangay officials ilabi na sa barangay tanod sa paglibot kag pagpangita sa mga nagagamit sang boga agud makumpiska.
Sa latest report sang Department of Health, ang boga amo ang mayor nga kabangdanan sang firecracker-related injuries sa diin naglab-ot sa 47 cases sa bilog nga Pilipinas.
Sandig sa Executive Order 28 kag Republic Act 7183, nakalista ang Philippine National Police sang 28 banned firecrackers lakip na diri ang watusi, piccolo, five star, pla-pla, lolo thunder kag iban pa.
Panugyan sang natungdan, mas maayo nga likawan na lang ang pagpalupok sa baylo maggamit na lang sang torotot , kaldero kag iban pa sa pagsug-alaw sang bag-ong tuig.
