ILOILO – Naglab-ot sang 20 ka mga kaso sang fireworks-related injuries ang narekord sang Department of Health Western Visayas Center for Health Development.
Ang ini nga numero ang humalin sang Disyembre 21, 2024 tubtob Disyembre 26, 2024.
Kadam-an sa mga sahi sang injuries nga reported sa sentinel kag non-sentinel hospitals amo ang blast ukon burn injury kag eye injury.
Ang mga nasambit nga injuries ang tuga sang mga palupok kaangay sang bamboo canon, five star kag boga.
Nagatumod ang sentinel hospitals sa mga designated facilities kaangay sang Western Visayas Medical Center sa Iloilo City kag Corazon Locsin Montelibano Memorial Regional Hospital sa Negros Occidental nga naga-report sang firework-related incidents.
Samtang, ang non-sentinel hospitals naman ang ginalakipan sang district hospitals, iban pa nga health facilities kag rural health units.
Padayon ang kampanya kag panawagan sang Department of Health sa publiko sang importansya sang safe nga pagsug-alaw sang bag-ong tuig nga indi kinahanglan maggamit sang palupok sa baylo paggamit sang alternatibo kaangay sang torotot, kaldero ukon pagpatukar sang magahod nga musika.
