Magapatuman sang motu proprio investigation ang Iloilo City Police Office (ICPO) sa Molo Police Station kasunod sang pagpalagyo sang isa ka illegal drug buy-bust subject sa ila nga istasyon.
Ang subject amo si Jennifer Marifosque, temporaryo nga residente sang Santo Niño Sur, Arevalo.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga ang tikang ang may tuyo nga matumod kon may negligence sa kapulisan nga nagbantay kag sa bahin sang City Drug Enforcement Unit (CDEU).
Suno kay Legada, kon matukiban nga may kapaslawan sa bahin sang mga nasambit nga natungdan, mahimo sila pagpasakaan sang administratibo nga kaso.
Ginpahayag man ni Legada nga pabutangan sang grills ang bintana sang comfort room ukon CR sang Molo Police Station agud nga indi na masulit ang hitabo.
I-evaluate naman sang talatapan ang mahimo dugang nga kaso subject nga nagpalagyo kasunod sang ginhimo sini.
Nahibaluan nga naglisensya si Marifosque nga magkadto sa CR sa diin yara ini nahamtang sa ika-duha nga panalgan sang police station.
Ini kasunod man sang pagreklamo sini nga nagasuka bangud nagasakit ang iya tiyan.
Sang yara na sa CR ang subject, ginpahanugutan na lang nila nga isirado ang pwertahan bangud man sa gender sensitivity ilabi na nga lalaki ang pulis nga bantay.
Sa mo nga tion, naglumpat halin sa bintana si Marifosque agud makapalagyo kon sa diin, ginpaandar pa sini ang gripo agud indi mabatian.
Naggamit naman ang subject sang pulungkuan agud makasaka sa bintana nga gin-agyan sini sa pagpalagyo.
Gilayon naman ini nadakpan kasunod sang matukiban nga nagakaon sang barbecue sa Iloilo Central Market.
