Gin-athag sang Iloilo City Police Station 8 nga personal nga nagpadulong sa ila si Sinikway, Lapuz Punong Barangay Felix Ventura agud nga magpa-blotter.
Ini kasunod sang ginaalegar sang kapitan nga gintayaan siya sang pusil ni former Punong Barangay Rodrigo ‘Boy’ Dellomes sang Don Esteban, Lapuz.
Sa interview sang Bombo Radyo kay Police Captain Lester Oliveros, Chief of Police sang Iloilo City Police Station 8, iya ginpahayag nga samtang nagasakay si Ventura kaupod ang iya live-in partner sa ila salakyan, ginhangkat siya ni Dellomes kag ginhambalan nga “maano ka? yudep*ta ikaw, gag* ka!”.
Ini bangud man sa ila anay mga daan nga hiligut-anon.
Suno kay Oliveros, ang live-in partner ni Ventura nga si Jinky Capistrano ang nakit-an si Dellomes nga may gina-uyatan nga armas-luthang.
Ginpahayag man sang natungdan nga nagsugat-anay ang duha ka mga punong barangay kag may natabo nga paghangkatanay.
Ginpanginwala naman ni Dellomes ang mga alegasyon ni Ventura batok sa iya.
Suno kay Dellomes, una siya nga ginbuyayaw ni Ventura kag naghana pa nga maggabot sang iya nga armas.
Ini ang baliskad man sa blotter report ni Ventura sa kapulisan.
Gin-athag man ni Dellomes nga madugay na nga wala siya sang armas-luthang, kon sa diin, may kalain lang gid nga hibubun-ot sa iya si Ventura.
