Ginpasalig sang National Food Authority (NFA) ang publiko nga may yara sang bastante nga rice buffer stocks agud masakop ang mga kinahanglanon sang mga relief agencies sa tion nga may emerhensya sa pihak sang holidays.
Ginpaguwa sang NFA ang nasambit nga pahayag kasunod sang mga report angot sa aktibidad sang Bulkan Kanlaon kag ang na-monitor nga forecast sa intertropical convergence kag rain showers sa kalabanan nga bahin sang pungsod.
Ginpahayag man sang NFA nga ginpabaskog sini ang ila palay buying strategies sa idalum sang Price Range Scheme (PRICERS) agud masabat ang mga request sa rice relief sang Department of Social Welfare and Development (DSWD), Local Government Units (LGUs), kag mga Legislators para sa distribution sa mga apektado nga pamilya kag indibidwal sa calamity stricken areas.
Ginhatagan man pagtamod sang NFA nga natuman sini ang 95% sang ila buffer stocking target subong nga tuig. Ang grains agency nagsiling nga ang ila karon nga buffer stock ang yara sa 5.661 million ka sako nga katumbas sang milled rice.
