Nagpangayo sang pasaylo si Russian President Vladimir Putin sa lider sang Azerbaijan kasunod sang pagtibusok sang isa ka eroplano sang Azerbaijan Airlines nga ginkamatay sang 38 ka mga tawo.
Tumalagsahon ang pag-sorry ni Putin apang wala sang direkta nga statement halin sa ila bahin ukon sa Kremlin nga naga-ako nga Russia gid man ang nagpatibusok sa eroplano.
Ang ginklaro lamang amo nga ginbuksan na ang imbestigasyon sa amo nga kaso.
Matandaan nga sang nagligad nga adlaw, ang Flight J2-8243 nga halin sa Baku sa Azerbaijian pakadto kuntani sa Chechen capital nga Grozny ang nag-crash malapit sa Aktau sa Kazakhstan. Ini matapos nag-divert ini halin sa southern Russia kun sa diin gina-alegar may Ukrainian drones nga naga-atake sa pila ka mga syudad.
May sources nga nagasiling nga santo sa preliminary findings, natukiban sang Azerbaijan nga nasal-an sang Russian air defenses ang airliner.
Suno sa statement sang Kremlin, nagpalab-ot man si Putin sang mensahe kay President Ilham Aliyev nga nagapabutyag sang simpatiya sa mga pamilya sang biktima kag madasig nga pag-recover sang iban nga nasamaran.
Ginpaathag man nga sang amo nga tion, naga-atake ang Ukraine unmanned aerial vehicles sa Grozny, Mozdok kag Vladikavkaz gani nga ginapunggan man sang Russian air defense systems ini nga mga atake.
Gindugang sang Russia nga ginakwestyon na subong ang “civilian and military specialists”.
Mangin si Ukrainian President Volodymyr Zelenskiy ang nagtawag man sa Azerbaijan leader kag nagpalab-ot sang simpatiya sa mga biktima kag nag-demand nga dapat may paathag nga himuon ang Russia.
Matandaan nga sa amo nga insidente, may 29 pa ka nga nakaluwas kag subong nagapaayo sa ospital.
