Ginkumpirma sang Philippine Embassy sa Kuwait nga may isa ka overseas Filipino worker (OFW) nga involved sa kamatayon sang isa ka bata sa sulod mismo sang balay sang iya employer sa nasambit nga pungsod.
Sa statement sang embahada, ginsiling sini nga nakibot gid sila kag nasubuan sa amo nga trahedya.
Nagpalab-ot man ini sang mensahe sang simpatiya sa pamilya sang biktima kag ginpahayag man nga naga-kooperar sila sa imbestigasyon nga ginahimo sang local authorities.
Suno sa embassy, nagahatag man ini subong sang bulig sa Pinay domestic worker nga santo sa layi sang Kuwait kag bilang pagsunod man sa mandato sang ila nga opisina.
“The Embassy is cooperating with Kuwaiti authorities investigating the incident and is also providing assistance to the detained Filipino domestic worker, within the framework of Kuwaiti law and in keeping with the Embassy’s mandate,” suno sa statement.
Nagdepensa man ang embassy nga isa ini ka isolated incident kag wala nagapakita kun ano ang pangkabug-usan nga Batasan sang mga Pilipino nga naga-trabaho sa Kuwait.
“This isolated incident does not reflect the character of Filipinos and the Filipino community in Kuwait, who are recognized for their hard work, reliability, and positive contribution to society,” suno pa sa embahada.
Base sa inisyal nga mga impormasyon, gindakop sang Criminal Investigation Department ang Filipina domestic worker sang nagligad nga Disyembre 26 matapos nag-ako sa pagpatay sa 18-ka-bulan nga bata sa sulod sang iya ginatrabahuan nga balay sa Sabah Al-Salem.
Suno sa Kuwaiti Council, gin-akusahan ang Pinay sa pagbutang sang bata sa sulod sang washing machine antes ini ginpaandar.
Nakasinggit pa ang bata kag nagdalagan pa ang iya ginikanan nga amo ang employers sang Pinay, apang dead on arrival sa ospital ang biktima.
Nagdepensa naman ang Pinay nga nahimo niya ini bangud naimpito siya bangud makaulugot ang bata.
Wala ginpaguwa ang identity sang Pinay apang magapabilin ini sa kustodiya sang Kuwaiti authorities samtang padayon ang imbestigasyon.
Matandaan nga may visa ban nga ginpatuman ang Kuwait sa Filipino nationals sang May 2023 matapos ang kamatayon sang Pinay nga si Jullebee Ranara nga nangin sentro sang tension sa tunga sang Kuwait kag Pilipinas.
Masobra isa ka tuig ang nagligad, gin-lift ang amo nga ban kag nagsugtanay ang duha ka pungsod nga mag-resume sa pag-recruit sang domestic workers.
